Ներքին գործերի նախարարության փրկարար ծառայության աշխատակիցների վերապատրաստման 2024 թվականի աշխատանքային պլանի համաձայն՝ սեպտեմբերի 16-20-ը ՆԳՆ ճգնաժամակյին կառավարման պետական ակադեմիայում անցկացվեց հրշեջ-փրկարարական ջոկատների հրամանատարների տեղակալների վերապատրաստման դասընթաց։ Մասնակցում էր 12 փրկարար ծառայող Երևանից և 10 մարզից։
Տեսական մասում ներկայացվել է՝
- Հետախուզությունը փրկարարական աշխատանքների իրականացման ժամանակ,
- Հրդեհաշիջման աշխատանքների կազմակերպումն ու ղեկավարումը,
- Գազածխապաշտպան ծառայության կազմակերպման մեթոդաբանությունը,
- Փրկարար ծառայողների ֆիզիկական պատրաստության իրավական ապահովումն ու կազմակերպման առանձնահատկությունները,
- Առաջին օգնությունը գիտակից և անգիտակից տուժածների դեպքում,
- Անտառային բուսածածկ տարածքներում հրդեհաշիջման աշխատանքների կազմակերպումը և այլն։
Գործնական աշխատանքն իրականացվել է 2 փուլով։ Ակադեմիայի մասնագիտացված լսարանում մասնակիցները նախ ծանոթացել են՝
- Տուժածների տեսակավորման սկզբունքներին՝ triage,
- Առաջին օգնությանն ուժեղ արյունահոսությունների ժամանակ,
- Փլուզված շինություններում որոնողափրկարարական աշխատանքների կազմակերպմանն ու իրականացմանը,
- Բարձրությունների վրա փրկարարական աշխատանքների իրականացմանը։
Գործնական պարապմունքների երկրորդ օրն անցկացվել է ՃԿՊԱ Լուսակերտի ուսումնական բազայում։ Իրականացվել է գազածխապաշտպան ծառայության և տարբեր գործառնական նշանակության շինություններում հրդեհաշիջման աշխատանքների կազմակերպում։
Դասընթացի ավարտին փրկարար ծառայողները հանձնել են ստուգարք՝ հակահրդեհային և փրկարարական պատրաստության թեմայով։
Պատրաստեց Անի ԱՆՏՈՆՅԱՆԸ
Լուսանկարները՝ Վահրամ ԱՎՈՅԱՆԻ
