Սեպտեմբերի 9-13-ն Արարատի մարզի Վեդու խոշորացված համայնքի Ուրցաձոր բնակավայրում անցկացվեց «Անտառային հրդեհների կառավարում և մարում» թեմայով վերապատրաստման դասընթաց՝ ԱՄՆ անտառային ծառայության միջազգային ծրագրերի Հայաստանի և Եվրասիայի կարողությունների զարգացման և արտակարգ իրավիճակների արձագանքման ծրագրերի շրջանակում։ Մասնակցում էին նաև դասախոսներ ՀՀ ներքին գործերի նախարարության ճգնաժամային կառավարման պետական ակադեմիայից:
Ըստ ծրագրի՝ տեսական մասում ներկայացվել են՝
- վայրի տարածքների հրդեհների հիմնական հասկացությունները,
- միջադեպերի կառավարման համակարգի սկզբունքները,
- ռելիեֆի 3D մոդելավորմամբ ավազե սեղանը, որի վրա մասնակիցները ստեղծեցին իրական հրդեհային իրավիճակներ փոքր մասշտաբով:
Դաշտային պարապմունքները ներառել են՝
- տարբեր տեղանքներում հրդեհի վարքագծի գնահատում,
- հրդեհաշիջման սարքավորումների գործնական կիրառում,
- արտակարգ իրավիճակների մոդելավորման ժամանակ թիմային աշխատանք:
ՃԿՊԱ փրկարարական ֆակուլտետի հակահրդեհային պատրաստության ցիկլի պետ, փ/ծ փոխգնդապետ Հարություն Ղազարյանի խոսքով՝ դասընթացի նորարարություններից մեկը հենց ավազե սեղանն էր, որը հնարավորություն տվեց մասնակիցներին GIS հենքով ծրագրի միջոցով ամբողջությամբ տեսնել Խոսրովի արգելոցի պատկերը, մշակել հրդեհի իրավիճակներ և կայացնել որոշումներ՝ ելնելով քամու ուժգնությունից և ուղղությունից:
Փրկարարը կարևորեց նաև հրդեհի կանխարգելման ամերիկյան մոտեցումները, որոնք կարող են արդյունավետ լինել նաև Հայաստանում: Օրինակ՝ հրդեհի տարածումը կանխելու համար արահետի պատրաստումը՝ մեծ թվով մարդկային ուժի ներգրավմամբ: Յուրաքանչյուրն ունենում է իր հստակ անելիքը՝ թակիչով մարել, քերիչով և բրիչով հողաշերտ փորել, հողաշերտը կտրատել և այլն: Ամերիկացի մասնագետներն առաջադրանքից առաջ պարտադիր կատարում էին հրահանգավորում և հնարավոր վտանգների մասին իրազեկում: Սա սովորեցնում է հրամանատարներին սերտ աշխատել անձնակազմի հետ:
Հարություն Ղազարյանի խոսքով՝ ցանկալի կլինի ակադեմիայի համար հետագայում ձեռք բերել արտակարգ իրավիճակների մոդելավորման ավազե սեղանը, որը թույլ կտա ավելի ակտիվորեն ներառել ուսանողներին շտաբային որոշումներ կայացնելու և կառավարման գործընթացներում:
Անի ԱՆՏՈՆՅԱՆ
Լուսանկարները՝ Վայրի բնության և մշակութային արժեքների պահպանման հիմնադրամի ֆեյսբուքյան էջից
