ՀՀ ներքին գործերի նախարարության Ճգնաժամային կառավարման պետական ակադեմիայի և Օրբելի եղբայրների տուն-թանգարանի համագործակցության շրջանակում՝ օրերս «Փրկարարական գործ» մասնագիտության երրորդ կուրսի 17 ուսանող իրենց կուրսային աշխատանքները պաշտպանեցին հենց թանգարանում։ Հանձնաժողովի կազմում էին ՃԿՊԱ ԱԻ և ՃԿ ֆակուլտետի դեկան, պատմական գիտությունների թեկնածու, դոցենտ Վահագն Կրբեկյանը, փրկարարական ամբիոնի դասախոս, կուրսղեկ Լիլիթ Սահակյանը և ջրափրկարարական ցիկլի պետ, միջազգային կարգի փրկարար Արտակ Էլմասակյանը։
Աշխատանքների թեմաներն էին՝
- Ջրասուզական գործ․ նպատակը, խնդիրները, առաջադրանքի կազմակերպման հիմունքները,
- Ջրասուզական և ջրափրկարարական գույք-հանդերձանք,
- Ջրասուզական աշխատանքների իրականացումը սառցապատ ջրատարածքներում,
- Անվտանգության ապահովումն ու կազմակերպումը ջրասուզական ստորջրյա աշխատանքների ժամանակ,
- Ջրահեղձում, դժբախտ պատահարներ։
- Կապը ջրասուզակի հետ։ Հասկացություն ջրափրկարարական աշխատանքներում կիրառվող թիավոր և շարժիչավոր նավակների մասին,
- Հնարավոր ջրասուզական հիվանդությունները, դրանց կանխումը, առաջին բուժօգնությունը դրանց առաջացման դեպքում։
- Ջրասուզական շնչասարքեր և այլն։
Արտակ Էլմասակյանն այս միջոցառումը խորհրդանշական համարեց, քանի որ Ռուբեն Օրբելին ստորջրյա հնագետ է եղել, առաջիններից մեկը, ով հնագիտական սուզումներ է կատարել Խորհրդային Միությունում և մասնակցել հատուկ նշանակության հետախուզական աշխատանքների։
«Ինքս մեծ համակրանք ունեմ գիտնական Ռուբեն Օրբելու նկատմամբ։ Մեզ համար պատիվ էր ջրասուզական և ջրափրկարարական թեմատիկայով կուրսային աշխատանքները ներկայացնել թանգարանի լավագույն դահլիճներից մեկում։ Այս համագործակցությունը շարունակական է լինելու»,- ասաց Արտակ Էլմասակյանը։
Միջոցառման ավարտին ուսանողները շրջեցին թանգարանում, ծանոթացան Օրբելի եղբայրների գործունեությանը։
Անի ԱՆՏՈՆՅԱՆ
Լուսանկարները տրամադրել են ՃԿՊԱ դասախոսները
