Հունիսի 6-7-ին Հայաստանի ազգային ագրարային համալսարանում կայացել է «Համալսարանների կառավարումն ու կազմակերպչական ենթակառուցվածքները որպես որակյալ կրթության հիմք» խորագրով աշխատաժողով՝ կրթության ոլորտում քաղաքականություն մշակողների և բուհերի ղեկավար անձնակազմի ներկայացուցիչների համար։ Հանդիպումը կազմակերպվել էր Էրազմուս + տեխնիկական աջակցության առաքելությունների շրջանակում: ՀՀ ներքին գործերի նախարարության Ճգնաժամային կառավարման պետական ակադեմիայից աշխատաժողովին մասնակցում էին որակի ապահովման կենտրոնի պետ, բուժծառայության գծով պահեստազորի փոխգնդապետ Աշխեն Խաչատրյանն ու մասնագիտական կողմնորոշման և կարիերայի ուղղորդման պատասխանատու, մանկավարժական գիտությունների թեկնածու, դոցենտ Ռուզաննա Ղարիբյանը:
Բանախոսում էր Եվրոպական համալսարանների ասոցիացիայի (ԵՀԱ) կառավարման, դրամաշնորհային և հասարակական քաղաքականության զարգացման տնօրեն, դոկտոր Թոմաս Էստերմանը։
Աշխատաժողովի նպատակն էր օգնել բուհերի ղեկավար անձնակազմին ներդնել առաջնորդության և կառավարման նոր մոտեցումներ` հիմք ունենալով եվրոպական կրթական համակարգը:
Ռուզաննա Ղարիբյանի խոսքով՝ ծրագրի ներկայացուցիչները խոսել են
- կառավարման տարբեր մոդելների և համալսարանի գործունեության վրա դրանց ազդեցության,
- կառավարման մեխանիզմներ և գործընթացներ մշակելու համար անհրաժեշտ առաջնորդության հմտությունների,
- համալսարանի կառավարման, որոշումների կայացման մեխանիզմների, բարելավման ենթակա ոլորտներն ուսումնասիրելու,
- առաջնորդության հմտությունները բարելավելու սեփական ռազմավարությունը մշակելու,
- փոխակերպումների միջով անցնելու և դրական ուսումնական միջավայր ստեղծելու մասին:
Պատրաստեց Անի ԱՆՏՈՆՅԱՆԸ
Լուսանկարը՝ Հայաստանում Էրազմուս + ազգային գրասենյակի կայքէջից
