ՆԳՆ փրկարար ծառայության աշխատակիցների վերապատրաստման 2024 թվականի աշխատանքային պլանի համաձայն՝ ՀՀ ներքին գործերի նախարարության ճգնաժամային կառավարման պետական ակադեմիայում մարտի 20-22-ն անցկացվեց «Հրդեհաշիջման և փրկարարական աշխատանքների կազմակերպում և իրականացում» թեմատիկայով վերապատրաստման դասընթաց, որին մասնակցեցին փրկարար ծառայության Երևան քաղաքի, Արագածոտնի, Կոտայքի, Արարատի և Արմավիրի մարզային փրկարարական վարչությունների տարբեր ստորաբաժանումների հրամանատարների տեղակալներն ու խմբի պետերը՝ ընդհանուր 15 հոգի։
Դասընթացում ներառված թեմաներից էին՝
- Հրդեհաշիջման աշխատանքների կազմակերպումը բարձրահարկ բնակելի շինություններում
- Անտառային և այլ բուսածածկ տարածքներում հրդեհաշիջման աշխատանքների կազմակերպման և ղեկավարման առանձնահատկությունները
- Փլուզված շինություններում փրկարարական աշխատանքների կազմակերպումը և իրականացումը
- Շնչառության համար ոչ պիտանի միջավայրում փրկարարական աշխատանքների իրականացումը և կազմակերպումը
- Փրկարարական աշխատանքների կազմակերպումը տրանսպորտային վթարների դեպքում
- Հրդեհաշիջման աշխատանքների կազմակերպումը կարևորագույն օբյեկտներում
- Հրդեհի վերլուծություն․ ուժերի և միջոցների գնահատումը և այլն։
Գործնական պարապմունքն անցկացվեց Լուսակերտի ուսումնական կենտրոնում։
ՃԿՊԱ փրկարարական ֆակուլտետի հակահրդեհային պատրաստության ցիկլի պետ, փ/ծ փոխգնդապետ Հարություն Ղազարյանի խոսքով՝ հիմնական նպատակն էր բարելավել փրկարարների հմտությունները մասշտաբային դեպքերի ժամանակ հրդեհաշիջման շտաբի ձևավորման և ղեկավարման հարցում։
Ըստ սցենարի՝ գրանցվել էր նավթամթերքի հրդեհ։ Փրկարարները փրփուրով կատարել են հրդեհաշիջում։ Բացի դրանից՝ երկրորդ հարկում իրականացվել է մարտական բացազատում, իսկ հակածխային օղակը ծխապատ գոտուց դուրս է բերել տուժածներին։
Դասընթացը վարել են ՃԿՊԱ դասախոսներ, փ/ծ փոխգնդապետներ Հարություն Ղազարյանն ու Հայկ Ղազարյանը և փ/ծ մայոր Հովսեփ Բադալյանը։
Հրավիրված մասնագետ, փրկարարական ուժերի վարչության ՀՓԱԿ բաժնի ավագ հրահանգիչ, փ/ծ փոխգնդապետ Հենրիկ Սիմոնյանը ևս խոսել է փրկարարական աշխատանքների կազմակերպման բարդություններից և իր երկարամյա ծառայության ընթացքում գրանցված պատահարներից։
Անի ԱՆՏՈՆՅԱՆ
Լուսանկարները տրամադրել են փրկարարները
