ՀՀ արտակարգ իրավիճակների նախարարության ճգնաժամային կառավարման պետական ակադեմիայի մշակույթի կենտրոնի «911» թատերախմբի փոքրիկ դերասաններն այսօր «Աղետիկը» ներկայացմամբ Երեւանի համար 194 հիմնական դպրոցում էին:
Բեմադրության հիմքում ՃԿՊԱ ռեկտոր, փ/ծ գեներալ-մայոր Համլետ Մաթեւոսյանի «Աղետիկը» մանկական բանաստեղծություններն են, նպատակը՝ «Կրթություն խաղի միջոցով» ձեւաչափով անվտանգության մշակույթի ձեւավորման են նպաստելը:
194 դպրոցի փոխտնօրեն Լիաննա Մանուկյանի խոսքով, խաղի միջոցով կրթությունը դատողական մտածողություն, եզրահանգումներ անելու ունակություն եւ վերլուծական միտք է տալիս: Այս դպրոցում կարեւորում են նման ծրագրերը, աշակերտները ակտիվ մասնակցում են www.dasaran.am առցանց հարթակում ներկայացված տրամաբանական խաղերին: Այդ խաղերի մեջ է նաեւ աղետների ռիսկի նվազեզման, կենսամիջավայրը ճանաչելու, անվտանգության մշակույթի ձեւավորմանն ուղղված «Սուպեր Դավիթ» խաղը:
«Աղետիկը» առաջին անգամ խաղացել են ՀՀ ԱԻՆ ճգնաժամային կառավարման պետական ակադեմիայի սաները՝ 2016 թվականի մարտին Տավուշի մարզի Ազատամուտ գյուղի դպրոցում: Անցած երեքուկես տարում ճգնաժամային կառավարման պետական ակադեմիայի ուսանողները, ապա նաեւ մշակույթի կենտրոնի սաները տարբեր հաստատություններում եւ կազմակերպություններում ներկայացրել են «Աղետիկը»:
Մասնավորաբար.
«Նարեկացի» արվեստի միությունում
Ճգնաժամային կառավարման պետական ակադեմիայում
Մարի Իզմիրլյանի անվան մանկատանը
«Երեխայի զարգացման կենտրոնում»
Կոտայքի մարզի Ձորաղբյուր գյուղում
Երևանի «Զատիկ» երեխաների աջակցության կենտրոնում եւ Կոտայքի ՍՕՍ մանկական գյուղում։