Տեղեկացրել ենք, որ նոյեմբերի 12-14-ը Հայաստանի Հանրապետության արտակարգ իրավիճակների նախարարության Ճգնաժամային կառավարման պետական ակադեմիայում կանցկացվի «Աղետների ռիսկի կառավարման արդիական հարցեր» խորագրով միջազգային գիտաժողով:
Գիտաժողովը նպատակաուղղված է արտակարգ իրավիճակներում բնակչության պաշտպանության եւ քաղաքացիական պաշտպանության ոլորտի զարգացման հեռանկարներին, աղետների ռիսկի կառավարման արդիական հարցերին, բնածին, տեխնածին, սոցիածին եւ այլ վտանգներից պաշտպանության հարցերով բնակչության ուսուցմանը, բնակչության շրջանում անվտանգության մշակույթի ձեւավորմանը, ճգնաժամային կառավարման հիմնախնդիրներին:
Գիտաժողովին ներկայացվող զեկուցումները կներառվեն արտակարգ իրավիճակներից բնակչության պաշտպանությանն ու քաղաքացիական պաշտպանությանը առնչվող մասնագիտական 3 սեկցիայում՝ կառավարում եւ տնտեսագիտություն, տեխնոլոգիաներ, գիտամեթոդական հիմնախնդիրներ: Միջազգային գործընկերները գիտաժողովին կարող են մասնակցել նաեւ առցանց:
Գիտաժողովին մասնակցելու համար անհրաժեշտ է լրացնել մասնակցության հայտ եւ ուղարկել ակադեմիայի էլեկտրոնային փոստի հասցեին՝ info@cmsa.am: Ներկայացվելիք զեկուցման ամբողջական տարբերակը՝ սկանավորված երաշխավորագրի հետ միասին, անհրաժեշտ է ուղարկել ակադեմիայի էլեկտրոնային փոստի հասցեին՝ info@cmsa.am, կամ ներկայացնել ակադեմիա (Երեւան — 40, Աճառյան 1, 2-րդ հարկ, 217 սենյակ) մինչեւ հոկտեմբերի 15-ը:
Գիտաժողովում ներկայացված զեկուցումները կտպագրվեն ակադեմիայի «Ճգնաժամային կառավարում եւ տեխնոլոգիաներ» գիտական հանդեսի հերթական համարում: Հանդեսն ընդգրկված է ատենախոսությունների հիմնական արդյունքների եւ դրույթների հրատարակման ՀՀ ԿԳՄՍՆ բարձրագույն որակավորման կոմիտեի համար ընդունելի պարբերական գիտական հրատարակությունների ցանկում:
