2016 թվականի մարտին ՀՀ ԱԻՆ ճգնաժամային կառավարման պետական ակադեմիայի սաները Տավուշի մարզի Ազատամուտ գյուղի դպրոցում առաջին անգամ ներկայացրեցին «Աղետիկը» երաժշտական փոքրիկ բեմադրությունը: Բեմադրության հիմքում ՃԿՊԱ ռեկտոր, փ/ծ գեներալ-մայոր Համլետ Մաթեւոսյանի «Աղետիկը» մանկական բանաստեղծություններն են, նպատակը՝ «Կրթություն խաղի միջոցով» ձեւաչափով անվտանգության մշակույթի ձեւավորման են նպաստելը: Անցած երեք տարում ճգնաժամային կառավարման պետական ակադեմիայի ուսանողները, ապա նաեւ մշակույթի կենտրոնի սաները տարբեր հաստատություններում եւ կազմակերպություններում ներկայացրել են «Աղետիկը»: Դեկտեմբերի 26-ին մշակույթի կենտրոնի «911» թատերախմբի փոքրիկ դերասանները Ճգնաժամային կառավարման պետական ակադեմիայում էին՝ աշխատակիցների երեխաների համար «Աղետիկը» խաղալու: Սա տոնական «Աղետիկ» է, Ձմեռ Պապի մասնակցությամբ եւ ուշադրություն է հրավիրում Ամանորյա «վազքին» բնորոշ ռիսկերին եւ հորդորում է զգույշ լինել Ամանորյա տոնածառը զարդարելիս, խմորեղեն թխելիս, տաք կերակուր պատրաստելիս եւ այլն: Անփոփոխ է «Աղետիկի» զգուշացումը.
Թե չէ գիտե՞ք ինչ կլինի,
Եթե լույսից կայծ բռնկի:
Եվ բազմաթիվ նման զգուշացումներից հետո նույնն է պատգամը.
Եթե այսպես միավորվենք,
Արհավիրքին, աղետներին
Մենք կհաղթենք:
Ճգնաժամային կառավարման պետական ակադեմիայում խաղացված «Աղետիկից» հետո հանդիսատեսին ներկայացան ՀՀ ոստիկանության փոքրիկ երգիչները:
Արամ ԶԱՔԱՐՅԱՆ
Լուսանկարները՝ Վահրամ ԱՎՈՅԱՆԻ
«Աղետիկը» արդեն եղել է
«Երեխայի զարգացման կենտրոնում»
Կոտայքի մարզի Ձորաղբյուր գյուղում
«Զատիկ» երեխաների աջակցության կենտրոնում եւ Կոտայքի ՍՕՍ մանկական գյուղում
«Կրթություն եւ կարիերա» միջազգային մասնագիտացված ցուցահանդեսի բացմանը
Մարի Իզմիրլյանի անվան մանկատանը